þriðjudagur, júlí 03, 2007

Maður hélt fyrst að hitamælirinn við N1 sjoppuna í Borgartúninu hefði bilað þegar þann sýndi 22 oC í dag um þrjú leytið, en þetta var víst nokkuð sanni lagi því mælar á götuskiltum sýndu óvanalega mikinn hita í dag. Það er ekki á hverjum degi sem maður er að ganga á Esjuna um miðnættið í stutterma og hnjábuxum. Tók langa æfingu í kvöld, hjólaði uppað Esju og gekk á hana og hjólaði síðan aftur heim. Var 3 tíma og korter. Korteri fljótari en síðast. Markmiðið hlýtur að vera að komast undir 3 klukkutíma.

Blaðamenn Mbl gera það ekki endasleppt. Nýlega fundu þeir inngang að jarðstöð við Kongens Nytorv sem meir að segja Danir höfðu ekki fundið fram að þessu. Í dag krufðu þeir til mergjar hið dularfulla morð á sænsku kameldýri sem hafði verið til umræðu þar í landi eftir að ónafngreint kameldýr hafði fundist dautt í vegarkanti. Það kom síðan í ljós að dýrið hafði losnað í kerru og slasast. Því hafði þurft að aflífa það. "Morðið á sænska kameldýrinu leyst" skrifar Mogginn. Í þessari setningu eru býsna margar vitleysur. Þeim sem kalla sig blaðamenn á Mogganum skal bent á að dýr eru ekki myrt, þau eru drepin, þeim er slátrað eða þau eru aflífuð. Fólk er myrt. Síðan er morð ekki leyst. Morð er upplýst, morðgáta er leyst.

Engin ummæli: