Ég fór austur í Friðland í Flóa í gærkvöldi að skoða og mynda fugla. Það er alltaf jafn gaman að koma þarna, ganga um, setjast niður á tjarnarbakka og stúdera fuglana. Þeir eru mjög spakir þarna nema fjárans endurnar. Það má ekki renna á þær auga úr mikilli fjarlægð, þá er eins og sé verið að skjóta á þær. Lómurinn, óðinshaninn og jaðrakaninn eru hins vegar hundspakir. Ég sá sæsvölu við Ölfusárbrúna. AÐ vísu úr nokkurri fjarlægð út um bílglugga en sama er, sæsvala var það. Ég hitti tvo karla frá Eyrarbakka um helgina sem sögðu mér af henni og svo sá ég hana í gær. Hún heldur fyrst og fremst til úti í Eyjum en flækingar koma upp á land einstaka sinnum. Ég er að lesa æfisögu EldeyjarHjalta sem Jói gaf mér. Þegar hann er ungur maður úti í Eyjum var voru allar klær hafðar úti við að ná sér í smá pening. Meðal annars gaf eggjasöfnun svolitla aura. Egg sæsvölunnar voru verðmætust því þau voru sjaldgæfust.

Ég hlustaði á hluta af umræðunum á Alþingi þegar ég var fyrir austan eða lestur heimastila eins og þessi dagskrárliður er oft nefndur. Einstaka maður flytur mál sitt blaðalaust og er það vel. Mér finnst að það sé lágmark að menn reyni að láta svo líta út sem þeir flytji ræðurnar en lesi þær ekki upp. Sá ræðumaður hefur miklu meiri sannfæringarkraft sem flytur ræðuna heldur en sá sem les hana upp. Ég hef ekki heyrt það áður í svona umræðum að einstakir stjórnarþingmenn vaði efnislega í forsætisráðherrann. Það ber nýrra við ef það á að vera plagsiður. Annað hvort vinna menn saman og afgreiða ágreining baksviðs eða ekki. Ég veit ekki hvort þetta sé hið nýja Ísland.

Það er svakalegt að horfa upp á hvert stórfyrirtækið falla í fang ríkisins á fætur öðru. Það getur ekki verið atvinnulífinu hollt að ríkið sé að verða æ stærri eigandi og ábyrgðaraðili á vinnumarkaði. Það verður fróðlegt að sá áætlun um hvernig á að vinna sig út úr þessu.

Maður heyrir alltaf af og til málsmetandi einstaklinga tala um að Alþjóða gjaldeyrissjóðurinn sé hið versta fyrirbæri og hann sé fyrst og fremst að þjálfa sig í fantabrögðum á íslensku þjóðlífi. Því sé skynsamlegast að slíta öllu samstarfi við hann og taka lán hjá vinum og kunningjum. Fagmenn sem maður treystir segjast síðan aldrei hafa heyrt aðra eins vitleysu. Við eigum engan góðan leik í stöðunni og hver leikur miðast við þá kastþröng sem við erum í. AGS er nokkurskonar eftirlitsnefnd sem veitir fyrirgreiðslu að uppfylltum ákveðnum skilyrðum. Honum er meðal annars kennt um að vextir lækki ekki hraðar en raun ber vitni. Ef þróun vaxta og gengis eru borin saman þá kemur í ljós að gengi krónunnar hefur hrokkið niður í hvert sinn sem vextir hafa lækkað. Því eru menn hræddir við að lækka vexti hraðar því það hafi áhrif á gengi krónunnar sem aftur á móti hefur áhrif á verðlag innflutnings, þróun gengistryggðra lána og verðbólgustig. Það er vandrataður meðalvegurinn.