Það er eins og hugurinn leiti svolítið vestur á bóginn þessa dagana. Fyrir ári síðan var föstudagur fyrir WSER að renna upp, skráning að byrja og alvaran ljós. Ég sé á snjóskýrslum að snjórinn er svipaður og í fyrra. Það þýðir að á fyrstu 25 mílunum eða um 40 km verður víða blautur snjór og drulla á hlaupaleiðinni. Leiðinlegt færi. Það sem verra er að veðurspáin sýnir að það eigi að verða allt að 40 oC bæði í Squaw Valley og eins í Auburn á laugardag og sunnudag. Það er svakalegt. Mér fannst nóg um þessi 32 - 33 oC í fyrra en þetta er miklu verra. Það eru svona hlutir sem geta haft mikil áhrif á árangur hlaupara þannig að enda þótt mikil vinna hafi verið lögð í æfiingar og undirbúning þá geta hin minnstu mistök í hlaupinu sjálfu gert það að verkum að allt fari í vaskinn. Ef maður blotnar í fætur snemma í snjónum og drullunni þá er hættt við að fá blöðrur og þá er illt í efni. Það er vont að þurfa að hlaupa yfir 100 km með blöðrur á fótunum ofan á allt annað. Ef maður drekkur of lítið í svona hita eða vanmetur saltþörfina þá getur maginn farið á hvolf o.s.frv, o.s.frv. Það eru einungis tveir norðurlandabúar með í ár, svíi og norðmaður.

Þar sem við förum norður á Sauðárkvók í eftirmiðdaginn þá geri ég ekki ráð fyrir að komast í tölvu fyrr en heim er komið til að sjá hvernig hlaupið gengur fyrir sig.

Í gær voru sumarsólstöður. Það fer að dimma af nótt og sumarið varla komið.

Víkingur og FH gerðu jafntefli í Víkinni í gær. Skítt því Víkingur hafði alla möguleika til að vinna.